O thubilwe ka Labobedi, morago ga gore a ntšhe R260 000 pankeng kua Mall of The North ka ntle ga Polokwane. Mohlaselwa wa go thubja o ile a latela go tšwa Mall of the North ka Polokwane go fihla lefelong la gagwe la bodulo gomme a thubela tšhelete ya R200 000.
“Dinyakišišo tša mathomo di laeditše gore mohlaselwa o be a sa tsebe gore o latelwa ke bagononelwa ba bararo bao ba sa tsebjego go tšwa lefelong la mabenkele le ge a otlela go ya lefelong la gagwe la bodulo.
“Ge a fihla kgorong ya tšhireletšo, o ile a thulana le bagononelwa ba babedi ba banna bao ba sa tsebjego bao ba ilego ba fologa koloing ye tšhweu ya Toyota Corolla mola ba mo šupa ka sethunya. Modirišani wa bona o ile a dula ka gare ga sefatanaga mola ba babedi ba thubile mohlaselwa mokotla wo o bego o na le tšhelete yeo le sešupanako sa letsogo,” mmoleledi wa maphodisa a profense ya Limpopo, Colonel Malesela Ledwaba, o boletše polelong.
“Ka morago ga tiragalo ye, bagononelwa ba kgonne go tšhaba lefelong la tiragalo ba otlela sefatanaga seo se boletšwego gomme mohlaselwa a ba latela go fihla Die Meer Street go leba Ladanna.
“Go thwe bagononelwa ba thuntšhitše dithunya tše dingwe ka lehlakoreng la sefatanaga sa mohlaselwa. Mohlaselwa o ile a boela morago ntle le dikgobalo go bega tiragalo yeo maphodiseng a lefelong leo.”
Mokhomišenare wa profense ya Limpopo, Molefotenente-Pharephare Thembi Hadebe, o lemošitše ditšhaba go efoga go rwala tšhelete ye ntši.
Maphodisa a hlohleletša mang le mang yo a ka fago tshedimošo ka bagononelwa go ikgokaganya le Mohlankedi wa Dinyakišišo Sajene Maphuta James Ngoepe go 0826859507 goba nomoro ya Crime Stop 0860010111 goba maphodisa a kgauswi goba My SAPSApp.
